Mu gihe isi ihanganye n’ikibazo cy’ihohoterwa rishingiye ku gitsina, cyane cyane rikorerwa abana b’abakobwa, guhugura abangavu no kubongerera ubushobozi byagaragaye nk’imwe mu nzira zifite ingufu zo guhangana n’iki kibazo. Iyo abangavu bahawe ubumenyi n’ijambo, babasha gufata ibyemezo bibarengera no kugira uruhare mu guhindura sosiyete babayemo.
Kumenya uburenganzira bwabo ni intambwe ya mbere. Iyo bahuguwe ku buzima bw’imyororokere, ihohoterwa, uburinganire n’ubwuzuzanye, barakura biyubaha kandi bazi uko birengera.
Umwe mu bangavu wo mu karere Ka Rulindo yagize ati: “Mbere sinari nzi ko hari aho nahungira igihe nahohotewe. Ubu nzi aho njya, n’uburenganzira mfite.”
Gukura bafite icyizere no kwigirira bituma abangavu batinyuka kwigaragaza no kuvuga ibibabangamira. Bahinduka abafatanyabikorwa mu kubaka umuryango ushishikajwe no kurandura ihohoterwa. Babasha no gufasha bagenzi babo, bagatanga ubuhamya, bakaganira ku bibazo bafitanye isano, bityo bakubaka ubufatanye bushyigikira impinduka.
Abangavu bafite ijambo baba umusingi w’iterambere rirambye. Iyo bashyigikiwe, baratanga ibitekerezo bifatika, bifasha abayobozi n’ababyeyi gufata ibyemezo bifitiye umumaro urubyiruko. Ni uko twubaka ejo hazaza h’Igihugu kitagira ihohoterwa, kandi buri mwana w’umukobwa agahabwa agaciro akwiriye.
