Abagenerwabikorwa ba Komisiyo y’Ubutabera n’Amahoro muri arikidiyosezi ya Kigali bo mu karere ka Rulindo bahuguwe ku ihame ry’uburinganire n’ubwuzuzanye ndetse n’amwe mu mategeko arebana n’iri hamwe.
Umukozi wa Komisiyo y’Ubutabera n’Amahoro ushinzwe guhugura aba baturage Murwanashyaka Eugene avuga ko Uburinganire n’ubwuzuzanye hagati y’umugore n’umugabo ni ihame ry’ingenzi rigamije kwimakaza uburenganzira, amahirwe angana n’agaciro ka buri wese mu muryango no mu buzima rusange.
Zimwe mu ngingo z’ingenzi zigaruka ku buringanire n’ubwuzuzanye hagati y’umugore n’umugabo nuko bombi bafite uburenganzira bungana mu mategeko, mu kazi, mu myigire no mu gutanga ibitekerezo.
Ati ” Bafite uburenganzira bungana ku mutungo, gufata ibyemezo, no kugira uruhare mu miyoborere no mu bibakorerwa.Buri wese agomba guhabwa amahirwe angana yo kwiga, kubona akazi, kujya mu myanya y’ubuyobozi, n’iterambere”.
Nta muntu ukwiye guhezwa cyangwa kubangamirwa bitewe n’igitsina cye. Umugabo n’umugore bagira uruhare rungana mu muryango: kurera abana, gutanga ibitekerezo, no gufata ibyemezo, bagira ubufatanye mu mirimo yo mu rugo n’indi nshingano z’urugo n’iterambere
Kurwanya ivangura n’ihohoterwa
Murwanashyaka avuga ko Uburinganire busaba kurandura imyumvire igaragaza ko igitsina kimwe kiruta ikindi. Harwanywa ihohoterwa rishingiye ku gitsina haba mu ngo, ku kazi, cyangwa ahandi hose.
abahawe aya mahugurwa bavuga ko bungutse ubumenyi butandukanye burimo kumenya ko umuryango wabo uwkiye gutozwa kwemera ko umugore ashoboye nk’umugabo kandi ko bombi bashobora gufatanya mu iterambere no guhindura imyumvire ya kera ishingiye ku gusumbanya ibitsina.
Basanga inyigisho bahawe ari nziza kuko bamenye ko bafite amahirwe angana, kandi ko nta gitsina gikwiriye gushukwa cyangwa guhezwa, ndetse bakigishwa indangagaciro no kwiyubaha bakanafasha mu gutegura no kubaka imiryango izira ivangura.
Iri hame rishingiye ku ndangagaciro z’ubumuntu, ubutabera, n’iterambere rirambye. Mu Rwanda, rishyigikirwa n’Itegeko Nshinga, politiki y’igihugu y’uburinganire, ndetse n’amadini arimo na Kiliziya Gatolika, aho by’umwihariko igaragaza ko umugabo n’umugore buzuzanya, kandi badasumbana.
