Ibitaro bya Ruli kuri iki cyumweru tariki 8 Gashyantare 2026 byizihije umunsi mpuzamahanga w’abarwayi bahabwa impano zitandukanye zirimo ibiribwa ibikoresho by’isuku ndetse bahabwa n’ifunguro.
Umunsi mukuru wizihijwe kuri iki cyumweru wari ufite insanganyamatsiko igira iti “Impuhwe z’Umusamariya : Gukunda wakira ububabare bw’undi”
Ni ibirori byabimburiwe n’igitambo cya Misa cyatuwe na Padiri Donatien Twizeyumuremyi umuyobozi wa Caritas Kigal na Komisiyo y’Ubutabera n’Amahoro muri Arkidiyosezi ya Kigali.
Mu ijambo rye yababwiye ko umunsi nkuyu ari uwo kubasubizamo imbaraga ngo bumve ko atari bonyine ko bitaweho kandi bakunzwe.
Ati “ Turizihiza umunsi wanyu twibanda ku kwimakaza indangaciro z’impuhwe, urukundo n’ubwitange mu kwita ku barwayi”.
Padiri Twizeyumuremyi yatanze ubutumwa bwibutsa buri wese kwita ku bubabare bwa mugenzi we no kumuba hafi kuko aba akeneye kwiyumva nk’umuntu ushyigikiwe.
Mu kwizihiza Umunsi mpuzamahanga w’abarwayi, habaye igikorwa cyo gusangira nabo no kubagaragariza urukundo n’impuhwe.
Abarwayi bahawe impano
Abakristu bitabiriye Misa begeranyije inkunga y’amafaranga ingana na 262250Frw. Habonetse kandi ibishyimbo 200kg, isabuni imiti 10, isukari 6kg, ifu y’igikoma 2kg, Papier hygienique 22, imyenda itandukanye, Movamavuta ya moviti nto 10, Pampex 2, imboga n’imbuto bitandukanye.
Umunsi w’abarwayi bose bahawe ifunguro
Umuyobozi mukuru w’ibitaro bya Ruli Dr Kaneza Deogratias, yashimiye abitabiriye kwizihiza uyu munsi abashimira ubufatanye n’uruhare bagira mu gutanga serivisi nziza ku barwayi.
Ati “Ubufatanye ni inkingi ikomeye mu guteza imbere serivisi z’ubuzima, niyo mpamvu umunsi nkuyu ari ingenzi kwifatanya n’abarwayi tubagaragariza urukundo”.
Abarwayi babahaye ifunguro barishima
Umunyambanga nshingwabikorwa w’umurenge wa Ruli, Hakizimana Jean Bosco, waruhagarariye ubuyobozi bw’akarere ka Gakenke , yashimiye Kiliziya n’Abihayimana ku musanzu wabo mu rwego rw’ubuzima. Yashimiye n’abatanga serivisi z’ubuzima anabibutsa kurushaho kunoza serivisi batanga.
