Ikigo Nderabuzima cya Shyorongi, giherereye mu Karere ka Rulindo, cyatashye ku mugaragaro inzu nshya y’ababyeyi yari ikenewe kugira ngo abo cyakira babone ahantu hagutse kandi haboneye ho kwipimishiriza inda, gukingirirwa no kubyarira.
Iyi nzu nshya y’ababyeyi, yubatswe ku bufatanye na ENI Foundation, yafunguwe ku mugaragaro ku wa 16 Ukwakira 2026, mu muhango wabereye muri Paruwasi ya Shyorongi, muri Arkidiyosezi ya Kigali.
Babanje kuvuga serivisi iki kigo nderabuzima gitanga ku bakigana
Uyu muhango wabimburiwe n’Igitambo cy’Ukaristiya cyatuwe na Padiri Donatien, uyobora Caritas na Komisiyo y’Ubutabera n’Amahoro (CDJP) muri Arkidiyosezi ya Kigali, wari uhagarariye Arkiyepiskopi wa Kigali, Antoine Cardinal Kambanda.
Wanitabiriwe n’Umuyobozi wungirije w’Akarere ka Rulindo ushinzwe imibereho myiza y’abaturage, abayobozi ba Kiliziya Gatolika n’abakozi batandukanye bo mu rwego rw’ubuzima.
Izafasha gukemura ikibazo cy’icyumba gito cyakoreshwaga n’ababyeyi
Ikigo Nderabuzima cya Shyorongi cyari gisanzwe gifite ikibazo cy’uko kitagira inzu yagenewe ababyeyi, bigatuma ababyeyi bakenera serivisi zijyanye no kubyara bakoresha icyumba kimwe gito, kitabahaga umwanya uhagije wo kwisanzura.
Padiri Donatien Twizeyumuremyi umuyobozi wa Caritas na Komisiyo y’Ubutabera n’Amahoro (CDJP) muri Arikidiyosezi ya Kigali yavuze ko iyi nzu nshya yubatswe igamije gukemura icyo kibazo, ikazafasha kunoza serivisi zihabwa ababyeyi no kongera ubushobozi bw’iki kigo mu kubitaho.
Ati “Iki kigo nderabuzima gitanga serivisi zitandukanye zirimo kwipimisha inda, gukingirwa no kwakira ababyeyi baje kuhabyarira”.
Mbere y’uko iyi nzu nshya yubakwa, iki kigo cyakiraga ababyeyi bagera kuri 131 buri kwezi n’abana 236, biganjemo abaturuka mu Mirenge ya Shyorongi, Rusiga, Kanyinya n’ahandi.
Biteganyijwe ko iyi nzu nshya izajya yakira ababyeyi bagera kuri 235 buri kwezi, bityo ikagura ubushobozi bw’ikigo mu gutanga serivisi zijyanye n’ubuzima bw’ababyeyi n’abana.
Ikigo kimaze imyaka 51 gitanga serivisi z’ubuzima
Ikigo Nderabuzima cya Shyorongi, cyitiriwe Mutagatifu Francisco w’Asizi, cyashinzwe mu 1975, kikaba kimaze imyaka 51 gitanga serivisi z’ubuzima.
Iki kigo kiri mu Karere ka Rulindo, Umurenge wa Shyorongi, Akagari ka Bugaragara, Umudugudu wa Kabaraza.
Cyateye iyi ntambwe mu gihe Arkidiyosezi ya Kigali nayo iri guhimbaza Yubile y’imyaka 50 imaze ishinzwe, kuko yashinzwe ku wa 10 Mata 1976.
Gufungura ku mugaragaro inzu nshya y’ababyeyi ni imwe mu ntambwe zigamije gukomeza kunoza serivisi z’ubuzima zitangirwa mu bigo nderabuzima bya Arkidiyosezi ya Kigali.
