Abakorerabushake 73 ba Serivise y’iterambere rya muntu ryuzuye (serivise de Développement Humain Intégral (SDHI) muri Paruwasi ya Rushubi bashishikarijwe gukomeza umurimo w’urukundo no kwita ku bakene n’abatishoboye, mu birori byo kwizihiza Yubile ya Caritas na Komisiyo y’Ubutabera n’Amahoro byabaye ku wa 28 Nzeri 2026.
Iki gikorwa cyabaye umwanya wo gushimira abakorerabushake n’abafatanyabikorwa bagira uruhare mu bikorwa bigamije guteza imbere imibereho y’abakene n’abandi bafite intege nke muri sosiyete.
Ubutumwa bwo gukomeza umurimo w’ubwitange bwatangiwe mu Gitambo cya Misa cyatuwe na Padiri Mukuru wa Paruwasi ya Rushubi, Padiri Floribert, washimiye abakorerabushake uruhare bagira mu gufasha abatishoboye.
Yabasabye gukomeza umurimo wabo, bakarangwa n’urukundo no guhora begereye abakene, babafasha guhangana n’ibibazo by’imibereho bahura na byo.
Abamaze imyaka irenga 20 muri Caritas bahawe impamyabumenyi z’ishimwe
Muri uyu muhango, abakorerabushake bamaze imyaka irenga 20 bakora umurimo w’ubwitange muri Caritas bahawe impamyabumenyi z’ishimwe, mu rwego rwo kubashimira ubwitange n’umusanzu wabo mu gufasha abatishoboye.
Iki gikorwa cyagaragaje agaciro k’umurimo w’abakorerabushake, bawukora badaharanira inyungu zabo bwite, ahubwo bagamije guteza imbere imibereho y’abandi.
Abakorerabushake ba ba Serivise y’iterambere rya muntu ryuzuye bagira uruhare mu bikorwa bitandukanye bigamije gufasha abatishoboye no guteza imbere imibereho y’abaturage, ku bufatanye na Caritas, Paruwasi n’abandi bafatanyabikorwa.
Abafatanyabikorwa bashimiwe gufasha abatishoboye kwiteza imbere
Hanashimiwe abafatanyabikorwa bagize uruhare mu gushyigikira ibikorwa bigamije gufasha abakene n’abatishoboye kwiteza imbere.
Muri ubwo bufasha harimo gutanga ibigega byo guhunikamo umusaruro, ibigega byo kubikamo amazi, amatungo ndetse no gufasha bamwe mu bagenerwabikorwa kubona ubwisungane mu kwivuza (Mutuelle de Santé).
Ibyo bikorwa bigamije gufasha abatishoboye kubona ibisubizo by’ibanze ku bibazo bahura na byo, kubongerera ubushobozi bwo kwiteza imbere no kunoza imibereho yabo.
Abafatanyabikorwa bashimiwe ko badashyigikira gusa ibikorwa by’ubufasha bw’ako kanya, ahubwo ko banagira uruhare mu bikorwa bishobora gufasha abagenerwabikorwa gukomeza kwiteza imbere.
Ubufatanye mu gufasha abatishoboye burakenewe
Kwizihiza Yubile ya Caritas na Komisiyo y’Ubutabera n’Amahoro muri Paruwasi ya Rushubi byabaye umwanya wo kongera gushimangira akamaro k’ubufatanye hagati y’abakorerabushake, Kiliziya n’abandi bafatanyabikorwa mu gufasha abatishoboye.
Iki gikorwa kandi cyashimangiye ko urukundo, ubwitange no kwita ku bafite intege nke ari indangagaciro zikwiye gukomeza kuranga ibikorwa bigamije imibereho myiza y’abaturage.
