Abanyarwanda batuye muri Leta ya Utah muri Leta Zunze Ubumwe za Amerika, hamwe n’abandi bagize umuryango w’Abakirisitu, bagize amahirwe yo gutura igitambo cya Misa cyatuwe na Musenyeri Édouard Sinayobye, uri muri iyo Leta muri gahunda y’uruzinduko rwa gishumba.
Utah ni imwe muri Leta zigize Leta Zunze Ubumwe za Amerika, iherereye mu burengerazuba bw’igihugu. Umurwa mukuru wayo ni Salt Lake City, umujyi uzwi kandi nk’ahari umuryango munini w’Abakirisitu Gatolika ndetse n’abantu baturutse mu bihugu bitandukanye. Muri uyu mujyi n’ahandi muri Utah usanga Abanyarwanda bahatuye, bakomeza gusigasira umuco wabo ndetse n’imibanire yabo n’abo basangiye ukwemera.
Abakirisitu bitabiriye igitambo cya Misa
Mu butumwa yatanze muri iyo Misa, Musenyeri Sinayobye yagarutse ku butumwa burambye bw’amahoro, imbabazi, ubumwe n’ubwiyunge, bwamamajwe na nyakwigendera Padiri Ubald Rugirangoga binyuze mu muryango yashinze witwa “Ibanga ry’Amahoro.”
Musenyeri Sinayobye yashimangiye akamaro ko gukomeza uwo murage, asaba abakirisitu gukomeza kwimakaza amahoro, kubabarirana no kubaka ubumwe mu bantu no mu miryango.
Bafashe ifoto y’urwibutso
Yagaragaje ko ubutumwa bwo kubabarirana no kwiyunga ari ingenzi mu kubaka imibanire myiza hagati y’abantu, cyane cyane mu miryango no mu muryango mugari.
Padiri Ubald Rugirangoga yari azwi cyane mu butumwa bwo gusaba abantu kubabarira no gusaba imbabazi, nk’inzira yo gukira ibikomere no kongera kubaka ubumwe. Ni muri urwo rwego yashinze umuryango “Ibanga ry’Amahoro”, wagize uruhare mu kugeza ku bantu ubutumwa bw’amahoro n’ubwiyunge.
Ubutumwa bwa Musenyeri Sinayobye muri Utah bwibukije Abanyarwanda n’abandi bakirisitu ko umurage w’amahoro utagomba kuba uw’amateka gusa, ahubwo ko ukwiye gukomeza gushyirwa mu bikorwa mu mibereho ya buri munsi, mu miryango no mu mibanire hagati y’abantu.
Uruzinduko rwa gishumba rwa Musenyeri Sinayobye muri Utah kandi rwabaye umwanya wo gusabana n’Abanyarwanda n’abandi bakirisitu bahatuye, gusangira ubutumwa bw’Ivanjili no gukomeza ubusabane mu muryango w’abemera.
